بلاد العـــــــرب

كان فيه زمان .... كان يا مكان بلاد جميلة ..اسمها بلاد العرب ...
كان الرجال .. لهم نخوة ... و للحريم كل احترام ...
و العيال من كتر الأمان .....بتلعب فالشوارع من غير خوف ولا خشيه
... من طيارة امريكانلى ولا دبابة صهيونلى

كان فيه زمان... كان يا مكان ... بلاد جميله أسمها.... بلاد العرب

تصحى علي شمسها فالجناين الخضرة مزهزهة .....
و تشرب من نهر فاض بالخير علي أرضها
و تاكل من تمرها ...و عنبها و تشم الفل الأبيض ...من فوق خدود أرضها ....
تحب تزرع فى خيرها و تحصد فى خيرها
و تنام قرير العين .....لانك في بلاد العرب

كان فيه زمان ...كان يا مكان .... بلاد جميلة أسمها..... بلاد العرب

بيمر العمر و بيجرى ... والشمس ما عدتش بتنور ....
و القمر المحاق في سماها فعز ليل أربعتاشر مستخبى
الأرض بور و النهر مالح .... و الفل مات فجناين إصفر ورقها من الفساد ...
إتحرق
الضرع جف ... و النخل ميل عالأرض ميت ..
و الصلب مش قادر ... يولّد ... من جديد ...شعب مات و اتقهر

كان يا مكان ..... كان فيه زمان ...بلاد جميلة أسمها ...بلاد العرب

أنا جبت الخريطة .... و شاورت بالقلم ...لولادي على مجد اتهدم
هنا صورة لنهر كان أسمه النيل وجف ......
و هنا كان مسجد اسمه الأقصى وأتهدم.... و كان هنا هرم وكان هنا برج ...
كان اسمه برج العرب ......
و دي القيروان ...
و دي كانت قصور ايام أمجاد العرب ...

يا ولادي كان يا مكان .... كان فيه زمان... بلاد جميله اسمها..... بلاد العرب

و بكيت على اطلالى ... وولادى مش فاهمين .....
و قالولي متبكيش عاللبن .... اللي وقع من سنين
عارفين أنها كانت بلاد ...جميلة اسمها مجازاً... بلاد العرب